Fria hen dlaid gans arig gschbuggd. I waiss näd rechd, awa i glaab, sen blos d'menna gwäsd. Koddara hadma doodazu gsaagd. Koddaschissla, des sen Schbuggnäbf, sen iwaraal rumgschd Uffam roodhaus, an da boschd, am waadsaal am boohoof un so an effendliche eirichdunga. Wann doo zum beischbiil am winda oowads d'fraaua so beinanna gsässa sen uf da schdrigfisid, manche hen aa fooasids zu da schdrigfisid gsaagd, sen als aa menna dabeigwäsd, un dii hen dann als imma am hääad ans faia oda an da äschakaschda oda ans koolaschiff neigschbuggd. A fraa had fazeeld, dassma als schegaa näd had laafa kenna uf da gass, so hadma ufbassa missa, dassma näd an di schbugge neigedabbd isch. -

An mann, däa wu haid iwa nainzich jooa ald isch, had fazeeld, daßam als buu s schlimmschde gwäsd isch, wanna als morgads am groosfadda sei koddaschissl had ausläära missa. Warum daßma friia so fiil gschbuggd had, waisa näd (fillaichd wais äbba äbbas do driwa). Nocham ledschda griig isch da leid d schbugge wäggebliwa. Seid sällara zeid schbuggd ma nimmee soo.

Bloos ooin beruuf machd des noch, des sen d fuusballa. Wama doo so foram fernsäa hogd un gugd soa schbiil oo,säädmase alfoad schbugga un doo, wu di fäansääkamera näd nookommd, donnse jo aa schbugga. Des isch arig. Awa wenichschdens waisma jeds, warum se alfoad noofalla un warum am goolmann efdas da balla durch d hen fludschd. Ma kannsich gaa näd fooaschdella, was des wääa, wann d boxa oda d ringa, dii wuu aa arig schwidsa, soo schbugga deeda! Un iwahaaubd d boxa, wann dii am ring bei jedam schlaag soo leichd noofalla deeda, wii d fuusballa um da elfa rum. Dii deeda grad noch liga! Haid donn dlaid nimmee schbugga, dafooa hens annare aaigahaaida an sich.